این سی تنہا جموں و کشمیر کو موجودہ دلدل سے نکال سکتی ہے: سجاد شاہین

بانہال میں نوجوانوں کی نیشنل کانفرنس میں شمولیت،پارٹی نے کیا خیر مقدم
لازوال ڈیسک
بانہال؍؍ جموں و کشمیر کو موجودہ دلدل سے نکالنے میں نیشنل کانفرنس کے اہم کردار کا تصور کرتے ہوئے، نیشنل کانفرنس کے رہنما اور ضلع صدر رامبن سجاد شاہین نے آج کہا کہ لوگ موجودہ دور کی غلط حکمرانی کی وجہ سے ناکامی سے مایوسی کا شکار ہیں۔انہوںنے مزید کہا کہ لوگ ایک مستحکم مقبول حکومت کی اہمیت کو سمجھ چکے ہیں، خاص طور پر جموں و کشمیر جیسی ریاست میں جو مختلف نوعیت کے مسائل سے دوچار ہے۔شاہین نے مختلف سیاسی جماعتوں سے وابستہ درجنوں نوجوان کارکنوں کا نیشنل کانفرنس میں استقبال کرتے ہوئے کہاکہ این سی جموں وکشمیر کو موجودہ دلدل سے نکال سکتی ہے۔انہوں نے کہا کہ نیشنل کانفرنس کا کوئی متبادل نہیں تھاکیونکہ نیشنل کانفرنس سب سے زیادہ آزمائشی اوقات میں امن کو یقینی بنانے اور ترقی کے لیے کوشاں رہی ہے۔
انہوں نے نیشنل کانفرنس کو ایک گہری جڑوں والی عوامی تحریک کے طور پر بیان کیا، جوریاست کے وجود میں یقین رکھتی ہے اور لوگوں کے تمام طبقات کی سیاسی-ترقیاتی امنگوں کو پورا کرنے کے لیے کوشاں ہے۔ انہوں نے سیاسی بیداری پیدا کرنے اور عوام کو اپنی قسمت کا مالک بنانے میں نیشنل کانفرنس کے تاریخی کردار کا حوالہ دیا۔ انہوں نے جمہوریت کو مضبوط بنانے اور عوام کے مختلف طبقوں کے درمیان دوستی کے بندھن کو قائم کرنے میں نیشنل کانفرنس کے تاریخی کردار کا بھی حوالہ دیا۔شاہین نے نئے آنے والوں کو مبارکباد دی اور امید ظاہر کی کہ اس سے نیشنل کانفرنس کو نچلی سطح پر مزید تقویت ملے گی۔